Істейтін ісі жоқ-ау. Жұмыс бөлмесінде бірен-саран біреулермен сөйлесуден басқа. Жұрт сияқты күнде барып қонатын үйі жоқ, күтіп отыратын семьясы, бала-шаға жоқ.
Ойланатын, өкінетін, өз бармағын қатты-қатты тістеуге уақыты көп есесіне.
Әбден қартайған шағымда осылай оңбай ұрынып қаламын,
деп ойламағаны анық.
Билікті біреуге тапсырып, Ельцин сияқты тыныш кете салатын жол да қалдырмапты өзіне. Билікті берген күні кісенделетін күйге жеткізді өзін өзі.
Жеке билігін созу үшін, демократиялық өркениетке қарсы ойында мықты жүріс жасап, автократияның ықпалын күшейтем деп бастаған кезекті соғысы – өлердей қате жүріс болып шықты. Осы қателігімен ол Ресейдің ту-талақайын шығарды, мемлекеттің берекесін қашырды, орыс ұлтын әлемге масқаралады.
Өзі халықаралық қылмыскер болды. Адамзатқа қарсы жасаған қылмыстары үшін бұл дүниеде оны тек Гаага соты күтіп тұр. Пропагандасы қалай оттап-көкісе де, Путин енді өзі түзей алмайтын, ешкім кешіре алмайтын қателік жасады.
Орыстың көзі қарақты кей сарапшылары жиырма жыл бұрын, Путиннің президент лауазымындағы әу бастағы тірліктеріне қарап, «Путин плохо кончит» деген. Дәл солай болып тұр енді.
Әлде, автократиялық биліктің бәрінің тағдыры осылай аяқтала ма? Тура алдындағы жарық, ашық жолмен жүргісі келмейтін ұрыдай, қараңғы түнекте адасқан күйі адасып барып түбі Путин сияқты бір шұңқырға топ етіп түсіп өле ме?
Көрейік енді, ертең Путинсіз Ресей қайтер екен? Қазақстанның билігі қайтер екен?
Қазақ ұлты, Қазақстан халқы қалай қарай бұрылар екен
…