Индустрия және инфрақұрылымдық даму министрлігі шетелдік тасымалдаушыларға Қазақстанға ЕО елдерінен әкелінетін жүктерге арналған ережелерді сақтауды ескертті.

Қазақстан аумағына Еуропадан тіркемелі жолмен әрі шамадан тыс жүктемемен тасымалданатын жүктерді жеткізу кезінде шетелдік тасымалдаушыларда тиісті үлгідегі екі рұқсат бланкісі болуы керек.

Ресей және Беларусь жүк тасымалдаушыларына Еуропалық Одақ тарапынан енгізілген санкция шектеулеріне байланысты бүгінде кәрі құрлық елдерінен Қазақстанға тасымалданатын жүктердің басым бөлігі шамадан тыс жүктемемен Беларустың шекаралық аймақтарында орналасқан терминалдар арқылы жүзеге асырылып жатыр,

делінген министрлік таратқан хабарламада.

Қазақстан Республикасының халықаралық шарттары мен ішкі заңнамасына орай осы жолмен жүк тасымалын жүзеге асыру кезінде шетелдік тасымалдаушыда өзімен бірге тиісті үлгідегі екі рұқсат бланкісі болуы керек:

• бірінші бланкіні тасымалдаушыға шекаралық терминалға дейін жүк жіберген тарап береді;
• екінші рұқсат бланкісі тіркемелі жолмен енгізілген жүктерді терминалда тиелген кезде беріледі. Ол рұқсаттама құжаты тиісті жүк Қазақстан аумағына енгенше жарамды болады.

Жүктерді үшінші елден шамадан тыс жүктемемен тасымалдау кезінде шетелдік тасымалдаушылар тарапынан шарттар жүйелі әрі жиі бұзылып жүр. Осыған байланыстыҚР Индустрия және инфрақұрылымдық даму министрлігі Сыртқы істер министрлігімен бірлесіп қызығушылық танытқан құзырлы органдар мен шетелдік ұйымдарға хабарлама жіберді.

Үшінші елдерден шамадан тыс жүктемемен әкелінетін тауарларға рұқсаттама беру жүйесін қолдану ережесі мен оны тасымалдаушыларды қадағалауы туралы ескертпелер ЕО, ЕЭО, ТМД елдері мен Украина және Грузияға жолданды.