Қырғызстан мен Тәжікстанның ұлттық қауіпсіздік қызметі басшылары екі ел арасындағы жанжалды бейбіт жолмен реттеу туралы хаттамаға қол қойды. Бұл туралы АКИpress хабарлады.

Министрлер кабинеті төрағасының орынбасары – Қырғызстан Республикасы Ұлттық қауіпсіздік мемлекеттік комитеті басшысы генерал-лейтенант Камчыбек Тәшиев қырғыз-тәжік шекарасындағы қарулы қақтығысты реттеу жұмысы аясында 19 қыркүйек күні кешке қарай Тәжікстан Ұлттық қауіпсіздік мемлекеттік комитеті төрағасы Саймумин Ятимовпен кезекті кездесу өткізді.

ҰҚК баспасөз қызметінің хабарлауынша, келіссөз нәтижесінде және бұрын қол жеткізілген атысты тоқтату және жағдайды деэскалациялау туралы уағданы орындау үшін тараптар Қырғызстан мен Тәжікстанның шекаралас аймақтарындағы қарулы қақтығысты реттеу туралы хаттамаға қол қойды. Хаттамада ұрыс қимылдарын толық тоқтату, әскерлер мен әскери техниканы олардың тұрақты орналасатын орындарына шығару, шекара заставалары мен комендатураларды бірлесіп тексеру, 14 және 16 қыркүйекте болған қарулы қақтығыстарды жан-жақты тексеру қарастырылған.

Шекара аймағында бейбітшілік пен тұрақтылықты тез арада қалпына келтіру бойынша тараптардың бірлескен жұмысы жалғасып жатыр,

делінген ҰҚК хабарламасында.

Хаттамаға Камчыбек Тәшиев пен Саймумин Ятимов қол қойды.

Тәшиев қырғыз-тәжік шекарасындағы қарулы шабуылды тергеп-тексеру үшін құрылған бірлескен комиссия 20 қыркүйектен бастап жұмысын жалғастыратынын айтты.

Кейінгі ресми ақпарат бойынша, 14-17 қыркүйекте Қырғызстанның 59 азаматы қаза болған, оның 40 адамы – сарбаздар. 164 адам жараланған. Шекарадағы қырғыз ауылдарынан 140 мыңнан астам адам қауіпсіз мекенге көшірілген. Тәжікстан сыртқы істер министрлігі 41 тәжік азаматы өліп, 100-ден астам адам жараланғанын хабарлады.

Екі ел шекарасындағы қақтығыс 14 қыркүйекте басталды. Екі тарап жанжал бастады деп бірін-бірі айыптаған. 16 қыркүйекте атысты тоқтату туралы бітімге келгенімен, атыс 17 қыркүйекте де тоқтамады.

Қырғызстан 19 қыркүйекті Аза тұту күні деп жариялады.